Արևմտյան Հայաստանից մեզ հասած ամենահամեղ ու յուրօրինակ ուտեստներից մեկը՝ «ՎԱՆԱՔԱՇՈՎԻ»

Տարբեր երկրների խոհանոցների մի շարք ուտեստներ այսօր այնքան հանրաճանաչ են դարձել, որ նույնիսկ հանդիսանում են տվյալ երկրի այցեքարտը: Իսկ ավանդական հայկական այդքան բազմազան ու յուրահատուկ խոհանոցից ոչ միայն աշխարհին, այլև հենց մեզ՝ հայերիս, քիչ թվով ճաշատեսակներ են հայտնի: Մինչդեռ մեր խոհանոցը հարուստ է հետաքրքիր ու սննդարար բազմաթիվ կերակրատեսակներով, որոնք պետք է վերարժևորել, որոշները գուցե և՝ վերհիշել:
Շարունակելով ներկայացնել հայկական ավանդական ուտեստները, հուսով ենք կնպաստենք նրանց պահպանմանը և տարածմանը աշխարհով մեկ: Այս անգամ պատրաստում ենք «ՎԱՆԱՔԱՇՈՎԻ»:
Վանաքաշովի-ն Արևմտյան Հայաստանից մեզ հասած ամենահամեղ ու յուրօրինակ ուտեստներից է, որը պատրաստում էին Արևմտյան Հայաստանի Վանի բնակիչները: Այդտեղից էլ ստացել է «Վանաքաշովի» անվանումը: Այն ձմեռային կերակուր է, որի հիմնական բաղադրիչներն են՝ բլղուրը, միսը կամ տհալը (մսի պահածո), լոլիկը, սոխը և համեմունքներ:

Պատրաստելու համար անհրաժեշտ է՝

Տավարի միս կամ տհալ – 200գ
Բլղուր խոշոր– 200 գ
Լոլիկ պահածոյացված կամ թարմ – 2-3 հատ
Սոխ – 2 գլուխ
Կարագ – 50գր
Շաքարավազ – 1 պտղունց
Սամիթ, աղ, սև պղպեղ – ըստ ճաշակի

 
Պատրաստման համար՝

Եփել տավարի միսը, արգանակը պահել: Միսը կտրատել խոշոր կտորներով: Սոխ նույնպես կտրատել խոշոր կտորներով՝ նավակաձև: Թավան տաքացնել ավելացնել կարագ և սոխ: Տապակել սոխը մինչև թեթև դեղնավուն գույն ստանալը, ավելացնել մի պտղունց շաքարավազ, որը սոխին կհաղորդի փայլ և կկարամելացնի: Համեմել աղով և սև պղպեղով: Տապակած սոխին ավելացնել կտրատած միս և միասին տապակել: Ավելացնել բլղուրը, աղել մի փոքր և միասին տապակել 1-2 րոպե: Այդ ընթացքում կեղևազատել լոլիկները և կտրատել խոշոր կտորներով և ավելացնել տապակին, վրան լցնել արգանակը, այնքան որ ծածկի: Ավելացնել մի կտոր կարագ և փակել կափարիչով: Եփել 10րոպե մարմանդ կրակի վրա՝ մինչև ջուրը քաշվի և բլղուրը եփի: Վերջում կտրատել սամիթը և ավելացնել ուտեստին: Ուտեստը կարելի է մատուցել թանով:

Բարի ախորժակ